తప్పించుకు తిరుగువాడె సీమాంధ్ర నేత సుమీ!

రాష్ట్రవిభజనపై మీ వైఖరి ఏమిటో చెప్పండి అన్న ప్రశ్నకు ఇన్నాళ్ళూ టీడీపీ, వైకాప, కాంగ్రేస్, లోక్‌సత్తా అనే తేడా లేకుండా అందరూ రకరకాలుగా సమాధానం దాటవేసి నెట్టుకొచ్చారు. ఒకరు ఇది కేంద్రప్రభుత్వం తీసుకోవాల్సిన నిర్ణయం ఆపేశక్తి మాకు లేదు అంటే ఇంకొకలు నేను వ్యతిరేకం గాదు, మరొకరు సామరస్య పరిష్కారం వెదకాలి అంటూ పదాలతో పదనిసలు చేశారు తప్ప సమాధానాలు చెప్పలేదు.

తీరా కేంద్ర నిర్ణయం తీసుకున్న తరువాత మేమే ఎక్కువ గట్టిగా విభజనకు అడ్డుపడుతున్నమంటే మేమే నంటూ సమైక్యాంధ్ర ఛాంపియన్షిప్ కోసం ఈసీమాంధ్ర నేతలంతా పోటీలు పడుతున్నారు. అందరూ సమన్యాయం , సామరస్యపూరిత పరిష్కారం కావాలనేవారే, కానీ అదెలాగోమాత్రం ఎవరూ చెప్పరు.

చివరికి విభజిస్తే సీమాంధ్రకొచ్చే సమస్యలేంటొనయినా చెప్పండి వీలయితే పరిష్కరిస్తామంటూ కేంద్రం ఒక మంత్రుల కమిటీని వేస్తే దానికి ఒక నివేదిక ఇవ్వడానికి కూడా ఈసీమాంధ్ర నేతలకు ధైర్యం చాలట్లేదు. ఇస్తే గిస్తే ఇక్కడ సీమాంధ్రలో వోట్లు పోతాయనో తెలంగాణలో వోట్లు పోతాయనో తప్ప ప్రజల సమస్యలనెలా కేంద్రానికి తీసుకెళ్ళాలి అని మాత్రం ఈ స్వార్ధ సీమాంధ్ర నాయకులకు పట్టదు.

ఎప్పుడూ తమ వోట్లు, తమ పదవులూ, తమ ఆస్థులూ, తమ కబ్జా భూములు, తమ ఆర్ధిక రాజకీయ అవసరాలు తప్ప ప్రజల క్షేమం పట్టని ఈ నేతలు ఇలా తప్పించుకు తిరుగుతూ ఇన్నాళ్ళూ తెలంగాణ ప్రజలను వంచిస్తే ఇప్పుడు తమ సొంత ప్రాంతమయిన సీమాంధ్ర ప్రజలనే వంచిస్తున్నారు. సీమాంధ్ర ప్రజలారా ఆలోచించండి.. ఈ దగుల్బాజీ నేతలు మీకవసరమా?