వెక్కిరిస్తూనే కాపీకొడతారు

తెలంగాణ ఉద్యమకారులు ఏం చేసినా సమైక్యవాదులు వెక్కిరిస్తారు. కానీ అలా వెక్కిరించిన మనుషులే తిరిగి అవే పనులను కాపీకొడతారు. ఇక్కడ ఒక విద్యార్థి జాక్ ఉంటే అక్కడా ఒక విద్యార్థి జాక్ వెలుస్తుంది. ఇక్కడ ఒక యూనివర్సిటీ ప్రొఫెసర్ జాక్ చైర్మన్‌గా వ్యవహరిస్తే అక్కడ కూడా ప్రొఫెసరునే జాక్ చైర్మన్‌గా పెట్టుకుంటారు. అయినా తిరిగి ఇక్కడ ఉద్యమాలు చేసే విద్యార్థులనూ, ప్రొఫెసర్లనూ వెక్కిరిస్తూనే ఉంటారు.

ఇక్కడ ఉద్యమకారులు తెలంగాణ కలాకారుల ఆటాపాటలతో హోరెత్తిస్తుంటే అక్కడ వారి ఉద్యమానికి పాడుకోవడానికి పాటలు లేక లగడపాటి నిరాహారదీక్ష చేస్తుంటే రింగ రింగా పాట పెట్టుకుని గంతులేశారు. చివరికి డబ్బులిచ్చి ఈమధ్యనే గజల్ శ్రీనివాస్‌తో ఏదో పాట రాయించుకున్నారు. ఇక్కడ ఒక మహాఘర్జన పెడితే అక్కడా ఒక సీమాంధ్ర మహాఘర్జన పెట్టే ప్రయత్నం చేస్తారు, కాకపోతే ఆచరణలో వెయ్యిమంది కూడా రాకా అది సీమాంధ్ర మహామ్యావ్‌మ్యావ్ అవుతుందనేది వేరే విషయం. ఇక్కడ విగ్రహాలు కూలగొడితే  అక్కడా విగ్రహాలు కూలగొడుదామని వెదికనట్టున్నారు, అయితే ఎక్కడా తెలంగాణ వారి విగ్రహాలు దొరకక పోవడంతో నోర్మూసుకున్నారు.

తాజాగా తెలంగాణ ఉద్యమకారుల రోడ్డుపై వంటా వార్పు కార్యక్రమాన్ని కూడా కాపీ కొట్టడం ఈమొత్తం కాపీ కార్యక్రమానికి పరాకాష్ఠగా నిలుస్తుంది. తెలంగాణ ఉద్యమకారులు శాంతియుతంగా నిరశన తెలుపడానికి వినూత్నంగా ఏర్పాటుచేసిన రోడ్డుపై వంటల కార్యక్రమం పూర్తి సక్సెస్ అయ్యింది. అయితే సమైక్యవాదులు మాత్రం అక్కసుతో ఆకార్యక్రమాన్ని కూడా వెక్కిరించారు. కొందరు బ్లాగుల్లో కూడా వెక్కిరించారు. అయితే ఇప్పుడు అదేకార్యక్రమాన్ని కాపీకొట్టి గుంటూరులో  చేశారు. అక్కడ కనీసం ఉద్యమ నేతలకుటుంబాలు కూడా పాల్గొనక అట్టర్ ఫ్లాప్ అయ్యింది. అయినా మన పచ్చపత్రిక మాత్రం అది గొప్పగా సక్సెస్ అయ్యిందని వార్త రాసింది.

ఇంతకూ నేను చెప్పేదేమిటంటే సీమాంధ్ర కుహనా సమైక్యవాదులారా, మీకెలాగూ సొంతగా ఆలోచించే తెలివిలేదు, మీవి ఎప్పటికైనా కాపీ బతుకులే.. అయితే ఒకవైపు మీరే వెక్కిరిస్తూ మీరే కాపీ కొడితే అభాసుపాలయేది మీరేనని తెలుసుకోండి.