ఔను, తెలంగాణ రైలు జీవిత కాలం లేటే!

1956 లో ఫజల్ అలి కమీషన్ రిపోర్టుతో మొదలయిన తెలంగాణ రైలుకు అడుగడుగునా కష్టాలు, మోసాలే ఎదురయ్యాయి. మాటిమాటికీ పట్టాలు తప్పిస్తున్న స్వార్ధపూరిత రాజకీయ నాయకుల మోసాల ఫలితంగా ఈరైలు ఇప్పటికే జీవిత కాలం లేటు అయ్యింది.

1956లో ఆంధ్రా నాయకుల సామ్రాజ్యవాదానికి కమ్యూనిష్టుల స్వార్ధ విశాలాంధ్ర నినాదమనే బ్లాక్‌మెయిలు తోడవడంతో పట్టాల్లు తప్పిన తెలంగాణ రైలును తిరిగి పట్టాలపై నిలబెట్టడం కోసం తెలంగాణ వాసులు ప్రాణాలకు తెగించి పోరాడారు. అయితే ఏం లాభం, కుత్సిత నాయకుల రాక్షస నీతి ఫలితంగా వందల ప్రాణాలు నేలకొరిగాయి, ప్రజల ఆవేశం పోలీసుల దమనకాండ, నాయకుల వంచన, ప్రభుత్వ కపటనీతి వలన మూగపోయింది.

తెలంగాన రైలును మేము తీసుకొస్తామన్న బీజేపీ ప్రభుత్వం పూర్తిమెజారిటీ తెచ్చుకోలేక కుత్సిత చంద్రబాబు మద్దతు తీసుకోవడం వలన 2000లో ఉత్తరాంచల్, చత్తీస్ఘర్, ఝార్ఖండ్ అనే మూడు రైళ్ళను ఏర్పాటు చేసిన ఎండీయే ప్రభుత్వం తెలంగాణ రైలును మాత్రం విస్మరించింది. 2001లో చంద్రశేఖరుడు తన స్వార్ధం కోసమే అయినా సరే మల్లి మరచిపోయిన తెలంగాణా రైలును ప్రజలకు గుర్తు చేశాడు. అయినా రైలు పట్టలపైకి మాత్రం రాలేకపోయింది.

తెలంగాన రైలు విషయంలో నేను మద్దతు ఇస్తానంటూ 2004లో మాట ఇచ్చిన దుష్టబుద్ది రాజశేఖరుడు ఏరు దాటగానే తెప్ప విషయం మరిచిపొయ్యాడు. 2008 ఎలక్షన్లొచ్చేసరికి మల్లీ మోసగాడు చంద్రబాబు నేను మారాను, నేను మీ తెలంగాణకు జరిగిన అన్యాయం తెలుసుకున్నాను అంటూ మాట మార్చి తెలంగాణ రైలును తన మానిఫెస్టోలో పెట్టుకుని మరీ ఎలక్షన్లలోకి వెల్లి 36 సీట్లు గెలుచుకున్నాడు.

చివరికి రెండువేల ఎనిమిదిలో చిదంబరం తెలంగాణ రైలును మొదలు పెడుతున్నామని చెప్పగానే ఒక్కసారి కుత్సిత నాయకుల వికృత రూపాలన్నీ బయటపడ్డాయి. నేను మారాను, తెలంగాణకు నేను మద్దతిస్తాను అంటూ, ఒకరోజు ముందు వరకూ బిల్లు పెట్టండి మద్దతివ్వ్వకపోతే అడగండి అన్న నక్కబాబు ఒక్కసారి మాటమార్చి ఎవరినడిగి ఈ అర్ధరాత్రి ప్రకటన అంటూ బీరాలు పొయ్యాడు, ఒకపక్క తన మనుషుల చేత తనే స్వయంగా కృత్రిమ ఉద్యమం రూపొందించాడు. మరోపక్క ఇచ్చేదీ తెచ్చేదీ మేమేనన్న వారంతా ఒక్క సారి అడ్డం తిరిగి రాజీనామాల డ్రామాలు చేశారు. అసలు లేనే లేని సమైక్యరైలును పీసీ సర్కార్లా మాయచేసి చూపించారు. ఏదయితేనేం తెలంగాణ రైలును మల్లీ పట్టాలు దించేశారు.

ఇంతలో మాయదారి శ్రీక్రిష్ణ కమిటీ వచ్చింది, మయసభలాగా అంతా మాయజేసి ఒక దిక్కుమాలిన రిపోర్టు తయారుజేసింది, తెలంగాణ రైలు మరో రెండడుగులు వెనక్కి వెల్లిపొయ్యింది.

చూస్తుండగానే ఒక జీవితకాలం గడచిపొయ్యింది. తేడా అల్లా ప్రజలకు ఇప్పుడు మునుపటిలా లేరు. నక్కబాబులూ, సోనియమ్మలు ఇంకా ప్రజలను ఏమార్చడం సాధ్యం కాదు. ఇప్పుడు ఇచ్చేదీ తెచ్చేదీ మేమే నన్నా, నేను మారాను నాకు తెలంగాణాకు జరిగిన అన్యాయం అర్ధమయింది అన్నా ప్రజలు నమ్మరు. మరి తెలంగాణా రైలుకు మద్దతు ఇస్తారో లేక తెలంగాణలో మీపార్టీల నాయకులు కాలుపెట్టలేకుండా చేసుకుంటారో మీ ఇష్టం. ఒక జీవిత కాలం ఇప్పటికే గడచిపోయింది, ఇప్పుడు ఇంకో జీవితకాలం ప్రజలు ఆగే స్థితిలో లేరు, మరి వినాయకులూ మీవైఖరి తేల్చుకోండి.